公視新聞網 https://news.pts.org.tw/article/705388 傳承內陸型王醮文化 宮廟辦鯉魚公工藝課程 發布時間：2024-07-17 19:15 更新時間：2024-07-18 10:28 李晨宇 / 臺南採訪報導 https://www.youtube.com/watch?v=EffMFlFDXgg 柳營代天院三年一科的王醮，這是臺南地區非常罕見的內陸型王醮，這陣嘛已經成做無形 文化資產。為著欲傳承這項文化，廟方頭一擺舉辦做鯉魚公的課程，歇熱時間去在地的三 間國中小推廣，tshuā學生認捌柳營王醮的文化內涵。（此則新聞標題、導言、內文皆為 臺語文。） 學生起頭用黏塗先捏魚仔的形體，挲圓形做魚仔的目睭，才閣用刀仔割出魚尾的外型，落 尾佇魚鰭頂頭插五方旗，這隻古錐的鯉魚公就做好勢矣。雖罔這鯉魚公是古錐版，伊是柳 營代天院，代天巡狩出巡時，tshuā領王船方向的領航員，也守護安全。這擺廟方參校園 合作，用趣味的方式， tshuā囡仔做黏塗那認捌在地的信仰民俗。 臺南市柳營國中學生，「鯉魚我有捏伊的目睭兼喙。」 臺南市柳營國中學生，「佇遮生活遮久攏無正式去了解遮，今仔日就了解足濟代天院的由 來，佮鯉魚公的。」 柳營代天院文傳副組長黃宥辰，「鯉魚公的金身攏有這个，五方旗的特色，這改的課程透 過捏塗的活動，予學生會當了解著鯉魚公，金身的特色。」 柳營代天院主神遊王公，因為神階懸，早前較少咧分靈，相傳鯉魚公通直接傳訊息予遊王 公，所以有濟濟信徒會請轉去拜。柳營代天院每三年會辦一科王醮，而且是真罕看會著無 靠海的內陸王醮。今年廟方設計課程毋但教囡仔動手做鯉魚公，嘛認捌百冬歷史的王醮特 色。 柳營代天院主會鄭百成，「請王 咱會當看著任何所在，大多數的請王攏是，佇海邊仔抑 是溪邊，柳營自古阮遮就無，伊是對南爿嘛就是山爿，並無去到溪邊。」 臺南市柳營國中校長陳育生，「以往予學生佮家長干焦知影，柳營代天院有遊王公祖，希 望透過這改實際上，來了解規个柳營王醮的歷史。」 柳營代天院的王醮文化，佇2022年嘛成做市定民俗。廟方這陣透過手工體驗課程，來推 sak這項無形文化資產。 洪家馨/編輯 -- ※ 發信站: 批踢踢實業坊(ptt.cc), 來自: 111.255.97.175 (臺灣) ※ 文章網址: https://www.ptt.cc/bbs/Gossiping/M.1721317436.A.455.html