公視新聞網 https://news.pts.org.tw/article/726204 《孫翠鳳和她的男人們》出版 記錄戲班萬項代 發布時間：2024-11-27 19:15 更新時間：2024-11-28 08:40 https://www.youtube.com/watch?v=E-Qz6_lB8Vo 臺灣歌仔戲國寶孫翠鳳，出了一本冊予做《孫翠鳳佮伊的查埔人》，記錄伊佇台頂演過的 小生、遮的查埔人的角色，伊也講家己原本是台語講袂輾轉的外省人，嫁入去歌仔戲大家 庭「明華園」，一路對小旦做到小生的過程。伊佇戲棚跤、生活中的查埔人——明華園的 總團長陳勝福，嘛來到現場共牽手支持。（此則新聞標題、導言、內文皆為臺語文。） 臺灣歌仔戲演員孫翠鳳有出一本冊，記錄著伊佇戲台頂做查埔人、演小生，對小旦安怎變 做當柱小生。而且伊戲棚跤的查埔人、也就是伊个翁婿——明華園總團團長陳勝福，嘛來 到現場，共伊支持。 孫翠鳳出新冊，名號做《孫翠鳳佮伊的查埔人》，紀錄伊佇戲台頂演過的小生的角色。孫 翠鳳嘛特別分享，家己原本是連台語攏講袂輾轉的外省人，嫁入去歌仔戲大家庭「明華園 」，對學台語、唱歌仔戲，一路到搬戲的過程。伊表示：「你想欲予這个大家族會當認同 你這个外省婆仔，你就愛有所犧牲，最後欲上台表演毋是遐爾仔簡單，阮的台語愛學甲足 準確的，而且要學文言文、愛閣學日語佮俗語。」 孫翠鳳的翁婿陳勝福嘛特別分享，伊的牽手拄學歌仔戲的笑詼代：「孫翠鳳上台講口白， 講一句爾，阮爸爸衝去後台，共阮導演、阮弟弟講，你莫予恁三嫂去演戲，按呢伊的台語 無人聽有！」 孫翠鳳講對小旦演到小生，伊攏總用三年的時間去研究查埔人，內面有浪子、有皇帝、閣 有法力無邊的大仙。伊講過程雖然辛苦，毋過佇伊的性命內面，從來就無「放棄」這兩个 字。這馬，對伊來講上重要的就是對歌仔戲的傳承，這个決心伊嘛絕對袂放棄。 盧元媜/編輯 -- ※ 發信站: 批踢踢實業坊(ptt.cc), 來自: 111.255.110.139 (臺灣) ※ 文章網址: https://www.ptt.cc/bbs/Gossiping/M.1732805176.A.721.html